Saksgang for klagen

Klagen blir med ein gong gitt til ein saksbehandlar, som går igjennom klagen og vurderer om han kan behandlast hos ombodsmannen. Dersom klagen ikkje kan behandlast, får du beskjed om det i løpet av to veker. I alle fall får du i løpet av to veker eit førebels svar, med informasjon om når du kan rekne med å høyre nærmare frå ombodsmannen.

Deretter vil ombodsmannen vurdere om det er grunnlag for å ta saka opp med det innklaga forvaltningsorganet. Vanlegvis tek denne vurderinga mellom fire og ti veker. Dersom det er grunnlag for å ta klagen opp til slik nærmare undersøking, vil ombodsmannen skrive brev til forvaltningsorganet og be om kommentarar til klagen. Ofte vil ombodsmannen også stille konkrete spørsmål. Forvaltningsorganet vil som hovudregel få fire vekers svarfrist. Når ombodsmannen har fått svar frå forvaltningsorganet, får du høve til å kommentere det.

Dersom det ikkje er grunnlag for å gå vidare med klagen, får du ei grunngiving for dette i eit brev frå ombodsmannen.

Ombodsmannen vil til slutt seie si meining om klagen.

Den saksbehandlingstida som er sett opp, er rettleiande.