Klageskjema

Når du sender eit elektronisk klageskjema til ombodsmannen, blir det behandla på lik linje med eit vanleg brev med omsyn til teieplikt, journalføringsplikt og føresegnene i offentleglova, forvaltningslova og personopplysingslova.

Opplysingane du legg inn i skjemaet, blir sende til ombodsmannen over ei sikker tilknyting (HTTPS). Dette tyder at uvedkommande ikkje kan sjå eller endre data som er sende. Skjemaet blir ikkje mellomlagra, og når alle skjemadata er registrerte i ombodsmannen sitt elektroniske saksbehandlings- og arkivsystem, blir dei sletta frå skjemaserveren.

Opplysingane du gir i klagen din, blir berre lagra i vår database for å kunne behandle klagen din. Opplysingane vil ikkje bli brukte i andre samanhenger eller av andre verksemder.

I samband med innsending av klager nyttar Sivilombodsmannen skjematenester levert av dataleverandøren CoreTrek. Dette selskapet vil berre ha tilgang på dine opplysingar i den grad det er naudsynt  for å overføre klagen din elektronisk.

Om du legg inn e-postadressa di under ’Personalia’, vil du få ei stadfesting på at klagen din er motteken per e-post med informasjon om den vidare saksgangen. Det er fullt mogeleg å sende inn skjemaet utan å oppgi e-postadresse.

Sivilombodsmannen vil svare på klagen din i vanleg brevs form. All vidare korrespondanse vil også føregå per vanleg brev. E-post er ikkje sikkert nok til å sende teiepliktige opplysingar og vil berre unntaksvis bli brukt til å svare på enkle spørsmål og til meldingar som ikkje inneheld sensitive opplysingar eller informasjon av privat karakter. Ombudsmannen oppmodar deg til ikkje å sende sensitive opplysingar på e-post.

Tilsette hos Sivilombodsmannen og andre som behandlar personopplysingar på vegner av Sivilombodsmannen, har teieplikt om opplysingar som går fram av klager.

Du kan når som helst be om å få sjå personopplysingane vi har registrert om deg og be om at unøyaktige eller ufullstendige personopplysingar blir retta eller sletta.